名家推荐：防线欠稳 狂攻博入多几粒 利物浦大盘屈基

今晚欧霸盃E组焦点战，英超利物浦主场硬撼比利时球队圣基莱斯联。「红军」今季踢法开放，几乎场场都有失波，好彩由穆罕默德沙拿率领嘅锋线火力全开，暂时仲可以弥补防线欠稳嘅问题，面对圣基莱斯联势必以攻代守，3.5球大盘咪错过。（Now 643周五凌晨3时直播）

虽然利物浦上仗喺联赛输畀热刺，同球证及VAR出错有关，不过无可否认佢哋今季防守确系欠稳。「红军」开咧後踢咗9场，只有赢阿士东维拉3比0一役保持清白之身，其余场场都有失波，中场逼抢做得唔够彻底，经常被对手打穿，中坚兼队长华基尔云迪积克亦无复当年勇，难怪後防穿晒窿。

不过利物浦前线个个都弗，王牌穆罕默德沙拿同箭头达云纽尼斯，今季各项赛事已经各入咗4粒，佢哋同翼锋路易斯迪亚斯，喺欧霸E组首轮反胜宁斯3比1之役齐齐建功，连同远射有一手嘅中场苏保斯拉尔，就算有加普因伤倦勤，主帅高普亦不愁进攻选择，主场出击更会放胆进攻争取入波。

作客嘅圣基莱斯联唔系一般善男信女，各项赛事近4仗未输过，依家喺比甲排紧榜首，欧霸E组首轮逼和图卢兹1比1，射手阿马利频频有士哥，上仗联赛仲特登被收起冇正选，摆明留力今仗。睇番利物浦近5仗有4次开4球或以上，有4仗系先失波，当中有3仗系反胜，既然防守不稳，倒不如狂攻入多几粒，今仗等睇入球骚。