盘口分析：阿仙奴士砵亭半场讲和

另一场欧霸16强次回合焦点战，阿仙奴番主场再斗士砵亭。首回合双方激和2比2，该场士砵亭战至损兵折将，今仗作客唔敢冒进，阿仙奴踢亲欧霸都例牌慢热，面对防守行先嘅士砵亭，初段随时老鼠拉龟冇碇埋手，半场和好路。

（Now 643周五凌晨4时直播）

葡超劲旅士砵亭首回合一度反先下，却因中场守田英正误摆乌龙，被阿仙奴逼和2比2，非常唔抵，最惨系呢位日本国脚，同队长兼中坚高亚迪斯，因累积黄牌够数，今仗要坐波监，失去呢两大主力，对中後场防守影响甚大。幸好现时欧洲赛冇作客入球优惠，因此和波即系由头嚟过，既然两大主力停赛，今仗造访酋长球场随时摆铁桶阵。

英超1哥阿仙奴虽然力争联赛，但主帅阿迪达亦表明唔会放弃欧霸，不过佢哋每逢出战欧霸，初段入局慢，近4仗欧霸有3次半场打和。虽然兵工厂近期顺风顺水，但查实各项赛事近14仗，都有9仗半场握手言和，加上唔排除佢哋会作出部分轮换，对住刻意死守嘅士砵亭，就算赢波晋级都会好吃力，半场和有计，进取啲不妨捧埋半全场「和主」。

大战前夕阿仙奴亦开始续约事宜，兵工厂主帅阿迪达非常器重中场格列沙加，希望提早同呢位30岁瑞士国脚续约至2025年；由於格列沙加将於明夏约满，会方有权优先同佢续约1年，并准备启动呢项续约条款，据悉阿迪达向格列沙加派定心丸，就算兵工厂今夏收购韦斯咸中场迪格兰赖斯，都唔会动摇佢嘅正选位置，预料双方好快会达成续约协议。