赛事前瞻：曼联细擒雷丁

英足盃第4圈，半只脚入咗英联盃决赛嘅曼联再度登场，主场迎战英冠球队雷丁，红魔鬼走势平稳向上，特别系对实力较弱球队胜率甚高，不过嚟紧仲有英联盃4强次回合，相信今场对雷丁见好就收，入波唔会多，佢哋近6仗主场5次开3球或以下，3.5球入球细博得过。

(无綫myTV SUPER周日凌晨4时直播)

曼联上仗英联盃4强首回合作客诺定咸森林大胜3比0，不过仲要踢埋次回合先确定决赛席位，呢场波对於6年未捧过盃嘅曼联嚟讲非常重要，因此今场对雷丁尽可能点到即止，避免太大损耗，近10场攻入10球嘅拉舒福特已成为入球保证，有佢喺度唔忧冇波入，後防有华拉尼拍住利辛度马天尼斯，仲有迪基亚把关，够晒稳阵。

值得留意嘅系，曼联近期愈踢愈顺，世盃前後一度录得9连胜，球队喺坦哈格调教下，对住联赛下游同低组别球队，都能够控制战局取胜，多场比赛都开3球或以下，相信今场又会系同一模式，赢两三球然後等完场。不过主胜同半场胜赔率冇肉食，上盘让到2球2球半又啱啱责界，胜负参半，3.5球嘅入球细可以话系最佳选择。

另边厢，雷丁排喺英冠中游，同曼联实力差距悬殊，作客奥脱福只有一条路，就系做好防守博偷鸡，只要佢哋守得住，入球细机会更高。