足彩分析：法福硬净细守拜仁

今晚德甲尾场上演前列大战，榜首拜仁慕尼黑主场火并「4哥」法兰克福。拜仁复赛後连和两场，一众进攻球员状态麻麻，法兰克福近况不俗，今场造访劲旅必定先求稳阵，中位数3.5球嘅入球细不容错过。

（周日凌晨1时30分开赛）

德国喺上年世盃分组赛出局，一众国脚返回拜仁後仍未回魂，歇冬後接连赛和RB莱比锡同科隆，尤其系上仗对科隆，若非甘美治完场前轰入世界波，随时输埋。除咗门神纽亚同前锋沙迪奥文尼养伤外，多名进攻球员如穆斯亚拿、利莱辛尼、京士利高文及基拿比都未挞着，基拿比更因表现太曳半场就被换走，有指基拿比上周日竟然去咗巴黎睇时装骚，高层认为佢嘅行为业余，今仗被雪唔奇。唔单止前线熄火，拜仁防守同样甩漏多多，就算签入瑞士门神恩尼森马顶档，但中坚乌柏美卡奴不时「自爆」，令人担心。

另一边厢，法兰克福走势唔错，近8仗联赛取得5胜2和仅1败，包括复赛後先大胜史浩克3粒，再被弗赖堡逼和1比1，单计近6仗联赛仅失7球，有5次开3球或以下，非常硬净，今仗作客更加会先做好防守。再睇埋积分榜，虽然拜仁顺利获得「半程冠军」，但只领先「法福」5分，就算第6位嘅弗赖堡亦同样落後5分，比起之前几年拜仁半季已带甩几条街，今季德甲争持激烈，拜仁依家明显未入局，连和两仗亦打击信心，今仗唔会轻举妄动，3.5球嘅入球细有计。